Listen live radio
- Advertisement -
മാനന്തവാടി:മതസൗഹാര്‍ദം ഊട്ടിഉറപ്പിക്കാനും സാഹോദര്യം മുറുകെ പിടിക്കാനും സമൂഹം തയാറാകണമെന്ന് മന്ത്രി ഒ.ആര്‍. കേളു പറഞ്ഞു. തൃശ്ശിലേരി മോര്‍ ബസേലിയോസ് യാക്കോബായ സുറിയാനി സിംഹാസന പള്ളിയില്‍ പരിശുദ്ധ യല്‍ദോ മാര്‍ ബസേലിയോസ് ബാവയുടെ ഓര്‍മ്മപ്പെരുന്നാളിന്റെ ഭാഗമായി നടന്ന സാംസ്‌കാരിക സമ്മേളനം ഉദ്ഘാടനം ചെയ്യുകയായിരുന്നു അദ്ദഹം. തൃശ്ശിലേരിയുടെ മത സൗഹാര്‍ദം രാജ്യത്തിന് മാതൃകയാണെന്ന് മലബാര്‍ ഭദ്രാസനാധിവന്‍ ഡോ.ഗീവര്‍ഗ്ഗീസ് മോര്‍ സ്‌തേഫാനോസ് മെത്രാപോലീത്ത അധ്യക്ഷ പ്രസംഗത്തില്‍ പറഞ്ഞു.പെരുന്നാള്‍ ദിനങ്ങളില്‍ ബഡ്‌സ് സ്‌കൂള്‍ സന്ദര്‍ശനം, രക്തദാനം,സണ്‍ഡേ സ്‌കൂള്‍ വാര്‍ഷികം തുടങ്ങിയ പരിപാടികള്‍ നടക്കും. പ്രധാന തിരുനാള്‍ ദിനങ്ങള്‍ 3,4 തീയ്യതികളിലാണ്.തൃശ്ശിലേരി ശിവ ക്ഷേത്രം പ്രതിനിധികളും, തൃശ്ശിലേരി ജുമാമസ്ജിദ് പ്രതിനിധികളും നേര്‍ച്ച ഭക്ഷണത്തിനുള്ള അരി പള്ളി ഭാരവാഹികള്‍ക്ക് കൈമാറി.മലബാര്‍ ഭദ്രാസനാധിവന്‍ ഡോ. ഗീവര്‍ഗ്ഗീസ് മോര്‍ സ്‌തേഫാനോസ് മെത്രാപോലീത്ത മുഖ്യ കാര്‍മികത്വം വഹിക്കും.
തൃശ്ശിലേരിയുടെ മണ്ണ് മത സൗഹാര്‍ദത്തിന്റെയും മാനവ സ്‌നേഹത്തിന്റെയും മണ്ണാണെന്ന് ബിഷപ് പറഞ്ഞു. ബസേലിയന്‍ പുരസ്‌കാരം തൃശ്ശിലേരി ബഡ്‌സ് സ്‌കൂളിനും ബസേലിയന്‍ പ്രതിഭ പുരസ്‌കാരം തിരുനെല്ലി അഗ്രൊ പ്രൊഡക്ഷന്‍ കമ്പിനി സിഇഒ രാജേഷ് കൃഷ്ണയ്ക്കും എക്‌സലന്‍സ് പുരസ്‌കാരം മിഥുന്‍ എല്‍ദൊ പുളിക്കക്കുടിയ്ക്കും സമ്മാനിച്ചു. യൂത്ത് അസോസിയേഷന്‍ ഭദ്രാസന കമ്മിറ്റി തയാറാക്കിയ രക്തദാന ഡയറക്ടറിയുടെ പ്രകാശനവും ചടങ്ങില്‍ നടന്നു. വികാരി ഫാ. ഷിന്‍സണ്‍ മത്തായി മത്തോക്കില്‍, ഫാ. തോമസ് നെടിയവിള, ഫാ. സിനു ചാക്കോ, തിരുനെല്ലി പഞ്ചായത്ത് അംഗം വി. ബേബി, തൃശ്ശിലേരി ശിവ ക്ഷേത്രം പ്രതിനിധി കെ.വി. സുരേന്ദ്രന്‍, തൃശ്ശിലേരി ജുമാമസ്ജിദ് പ്രസിഡന്റ് റഷീദ് തൃശ്ശിലേരി , തൃശ്ശിലേരി സിഎസ്‌ഐ പള്ളി വികാരി ഫാ. സി.ജെ. ജോണ്‍സന്‍, തൃശ്ശിലേരി ആര്‍സി പള്ളി വികാരി ഫാ. പ്രകാശ് വെട്ടിക്കല്‍, യാക്കോബായ സഭാ മാനേജിങ് കമ്മിറ്റി അംഗം കെ.എം. ഷിനോജ്, രാഷ്ട്രീയ പാര്‍ട്ടി പ്രതിനിധികളായ എ.എം. നിശാന്ത്, ബിജു കുഞ്ഞുമോന്‍, യൂത്ത് അസോസിയേഷന്‍ ഭദ്രാസന സെക്രട്ടറി കെ.പി. എല്‍ദൊ, പള്ളി ഭാരവാഹികളായ സി.എം.എല്‍ദോ ചെങ്ങമനാട്ട്, ബേസില്‍ ജോര്‍ജ് ഞാറകുളങ്ങര, പി.കെ. ജോര്‍ജ് പുളിക്കക്കുട്ടിയില്‍, പി.പി.സ്‌കറിയ പുളിക്കക്കുടി, എന്നിവര്‍ പ്രസംഗിച്ചു. 3ന് കുര്‍ബാന, കാല്‍ നട തീര്‍ത്ഥയാത്രക്ക് സ്വീകണം, പ്രദക്ഷിണം, സന്ധ്യാ പ്രാര്‍ത്ഥന എന്നിവ ഉണ്ടാകും. സമാപന ദിവസമായ 4 ന് മൂന്നിന്‍മേല്‍ കുര്‍ബാന, ചാരിറ്റി വിതരണം, ഓണ്‍ലൈന്‍ സുവിശേഷ ഗാന മത്സര വിജയികള്‍ക്കുള്ള അവാര്‍ഡ് വിതരണം, കാക്കവയല്‍ കുരിശിങ്കലേക്ക് പ്രദക്ഷിണം, ലേലം, നേര്‍ച്ച ഭക്ഷണം കൊടിയിറക്കല്‍ എന്നിവയും നടക്കും.
