എടിഎമ്മിൽ നിക്ഷേപിക്കാൻ ഏൽപ്പിച്ച പണം തട്ടിയ യുവാക്കൾ പിടിയിൽ

ബത്തേരി: എ.ടി.എമ്മുകളില്‍ നിക്ഷേപിക്കാനേല്‍പ്പിച്ച ബാങ്കിന്റെ കാല്‍ കോടിയോളം രൂപ തട്ടിയ ക്യാഷ് ഓപ്പറേറ്റീവ് എക്‌സിക്യൂട്ടീവുകള്‍ പിടിയില്‍. ബത്തേരി, കുപ്പാടി, പുത്തന്‍പുരക്കല്‍ വീട്ടില്‍, പി.ആര്‍. നിധിന്‍ രാജ്(34), മേപ്പാടി, ലക്കിഹില്‍, പ്ലാംപടിയന്‍ വീട്ടില്‍, പി.പി. സിനൂപ്(31)എന്നിവരെയാണ് ബത്തേരി പോലീസ് അറസ്റ്റു ചെയ്തത്.

കേരള ഗ്രാമീണ ബാങ്കിന്റെ വിവിധ എ.ടി.എമ്മുകളില്‍ പണം നിക്ഷേപിക്കുന്ന ബത്തേരി നോഡല്‍ ബ്രാഞ്ചിലെ ജോലിക്കാരായിരുന്ന ഇവര്‍ 28 ലക്ഷം രൂപയാണ് കവര്‍ന്നത്. 2021 നവംബര്‍ മുതല്‍ 2023 സെപ്റ്റംബര്‍ വരെയുള്ള വിവിധ കാലയളവിലാണ് തട്ടിപ്പ് നടത്തിയത്. എ.ടി.എമ്മുകളില്‍ നിക്ഷേപിക്കാന്‍ ബാങ്ക് ഏല്‍പ്പിച്ച മുഴുവന്‍ തുകയും നിക്ഷേപിക്കാതെ   വിഡ്രോവൽ അക്നോൾഡമെൻ്റ് സ്ലീപ്പുകളിൽ തിരുത്തലുകൾ വരുത്തി  ഒറിജിനല്‍ ആണെന്ന് വ്യാജേന ബത്തേരി ബ്രാഞ്ചില്‍ സമര്‍പ്പിച്ചു വരുകയായിരുന്നു ഇവർ. ബത്തേരി ഗ്രാമീണ ബാങ്ക് സീനിയര്‍ മാനേജര്‍ നല്‍കിയ പരാതിയുടെ അടിസ്ഥാനത്തിലാണ് നടപടി.