നാലിടത്ത് ബി.ജെ.പി മുന്നേറ്റം, പഞ്ചാബിൽ ആം ആദ്മി

ന്യൂഡൽഹി: ഉത്തർപ്രദേശ്, ഉത്തരാഖണ്ഡ്, പഞ്ചാബ്, മണിപ്പുർ, ഗോവ എന്നീ അഞ്ചുസംസ്ഥാനങ്ങളിലേക്ക് നടന്ന നിയമസഭാ തിരഞ്ഞെടുപ്പിന്റെ വോട്ടെണ്ണൽ ആരംഭിച്ചു. രാവിലെ എട്ട് മുതലാണ് വോട്ടുകൾ എണ്ണി തുടങ്ങിയത്. തപാൽവോട്ടുകളാണ് ആദ്യമെണ്ണുന്നത്. വോട്ടെണ്ണലിന്റെ തത്സമയ വിവരണം മാതൃഭൂമി ഡോട്ട് കോമിൽ ലഭ്യമാണ്. യുപിയിൽ ആദ്യ ലീഡ് നില അനുസരിച്ച് ബിജെപിയാണ് മുന്നിൽ

കഴിഞ്ഞദിവസം പുറത്തുവന്ന എക്സിറ്റ് പോൾ ഫലങ്ങൾ യു.പി., ഉത്തരാഖണ്ഡ്, മണിപ്പുർ എന്നീ സംസ്ഥാനങ്ങളിൽ ബി.ജെ.പി.ക്ക് മേൽക്കൈ പ്രവചിച്ചിരുന്നു. ഗോവയിൽ കോൺഗ്രസും ബി.ജെ.പി.യും ഒപ്പത്തിനൊപ്പമെന്നാണ് സൂചന. പഞ്ചാബിൽ എക്സിറ്റ്‌പോളുകളെല്ലാം ആം ആദ്മി പാർട്ടിക്ക് ഭരണമുറപ്പിക്കുന്നു.

ഉത്തർപ്രദേശിൽ 403 സീറ്റുകളിലേക്കും പഞ്ചാബിൽ 117 സീറ്റുകളിലേക്കും ഉത്തരാഖണ്ഡിൽ 70 സീറ്റുകളിലേക്കും മണിപ്പുരിൽ 60 സീറ്റുകളിലേക്കും ഗോവയിൽ 40 സീറ്റുകളിലേക്കുമാണ് തിരഞ്ഞെടുപ്പ് നടന്നത്.