Listen live radio
സംസ്ഥാനത്ത് മഴ കനക്കുന്നു; ഒപ്പം കൊവിഡും, വടക്കന് കേരളത്തില് ഇന്ന് അതിതീവ്ര മഴക്ക് സാധ്യത
തിരുവനന്തപുരം: സംസ്ഥാനത്ത് ദിനംപ്രതി കൊവിഡ് രോഗികളുടെ എണ്ണം വര്ദ്ധിച്ചു കൊണ്ടിരിക്കുന്ന സാഹചര്യത്തില് മഴയും ശക്തി പ്രാപിക്കുകയാണ്. വടക്കന് കേരളത്തില് ഇന്ന് അതിതീവ്ര മഴക്ക് സാധ്യതയുണ്ടെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. 5 ജില്ലകളില് യെല്ലോ അലര്ട്ടായിരിക്കും. ആലപ്പുഴ, കോട്ടയം, എറണാകുളം, തൃശ്ശൂര്, പാലക്കാട് ജില്ലകളിലാണ് യെല്ലോ അലര്ട്ട്.
കേരള തീരത്ത് 40 മുതല് 50 കി.മീ. വരെ വേഗത്തില് കാറ്റിനും 4 മീറ്റര് വരെ ഉയരത്തില് തിരമാല അടിക്കാനും സാധ്യതയുണ്ട്. മത്സ്യത്തൊഴിലാളികള് കടലില് പോകരുതെന്നും മുന്നറിയിപ്പ് നല്കിയിട്ടുണ്ട്. ഇന്നലെ ആരംഭിച്ച മഴ കോഴിക്കോട് ജില്ലയിൽ രാത്രി കഴിഞ്ഞും തുടരുകയാണ്. കനത്ത മഴയിൽ തൊട്ടിൽപാലം പുഴ കരകവിഞ്ഞു. ചോയിചുണ്ട് ഭാഗത്ത് താമസിക്കുന്ന ഏഴ് കുടുംബങ്ങളെ മാറ്റി പാർപ്പിച്ചു.
മുള്ളന്കുന്ന് നിടുവാന്പുഴ കരകവിഞ്ഞൊഴുകി ജാനകികാട് റോഡിലും വെള്ളം കയറി. ജാനകികാടിനടുത്ത് തുരുത്തില് കുടിങ്ങിയ രണ്ടുപേരെ ഫയര്ഫോഴ്സ് രക്ഷപ്പെടുത്തി. ജില്ലയിൽ പുഴകളുടെ തീരത്ത് താമസിക്കുന്നവർക്ക് ജാഗ്രതാ നിർദേശം നൽകിയിട്ടുണ്ട്. കുറ്റ്യാടിയിൽ കനത്ത മഴയിൽ നിരവധി കടകളിൽ വെള്ളം കയറി.