Listen live radio
സംസ്ഥാനത്ത് ഇന്ന് മാത്രം 4 കൊവിഡ് മരണം
തിരുവനന്തപുരം: സംസ്ഥാനത്ത് ഇന്ന് മാത്രം 4 കൊവിഡ് മരണം. മലപ്പുറം പെരുവള്ളൂര് സ്വദേശി കോയാമു മഞ്ചേരി മെഡിക്കല് കോളേജിലാണ് മരിച്ചത്. ഇദ്ദേഹത്തിന്റെ ഭാര്യയും മക്കളും ഉള്പ്പെടെ 10 പേര് കൊവിഡ് ചികിത്സയിലാണ്. പാലക്കാട് ഓങ്ങല്ലൂര് സ്വദേശി കോരനും ഇന്ന് മരിച്ചു. കോരന്റെ ബന്ധുക്കളായ നാല് പേര്ക്കും കൊവിഡ് സ്ഥിരീകരിച്ചിട്ടുണ്ട്. എറണാകുളത്ത് ഇന്നലെ മരിച്ച മുതിര്ന്ന സോഷ്യലിസ്റ്റ് നേതാവ് ആലുങ്കല് ദേവസിക്ക് കൊവിഡ് സ്ഥിരീകരിച്ചു. സംസ്ഥാനത്ത് ആദ്യമായി പൊലീസ് ഉദ്യോഗസ്ഥന് കൊവിഡ് ബാധിച്ച് മരിച്ചു. ഇടുക്കി സ്പെഷ്യല് ബ്രാഞ്ച് എസ്.ഐ അജിതൻ ആണ് മരിച്ചത്. ഇന്നലെ രാത്രി കോട്ടയം മെഡിക്കൽ കോളേജിൽ വെച്ചാണ് മരണം.
അതേസമയം സംസ്ഥാനത്ത് രോഗബാധ രൂക്ഷമായിക്കൊണ്ടിരിക്കുകയാണ്. തിരുവനന്തപുരത്തും വയനാടും രോഗവ്യാപനം കൂടുന്ന സാഹചര്യമാണുള്ളത്. തിരുവനന്തപുരത്ത് ഇന്നലെ 320 പേര്ക്കാണ് ജില്ലയില് രോഗം സ്ഥിരീകരിച്ചത്. ഇതില് 311 പേര്ക്കും സമ്പര്ക്കത്തിലൂടെയാണ് രോഗബാധ. ക്ലസ്റ്ററുകള്ക്ക് പുറത്തേക്ക് രോഗം വ്യാപിക്കുന്നതാണ് പ്രതിസന്ധിയുണ്ടാക്കുന്നത്. കൊച്ചുതുറയില് മിഷണറീസ് ഓഫ് ചാരിറ്റി ശാന്തിഭവനിലെ 35 പേര്ക്ക് രോഗം സ്ഥിരീകരിച്ചു. ഇതില് 27 പേരും പ്രായമായവരാണ്.
അതേസമയം കോവിഡ് സമ്പർക്ക വ്യാപനം രൂക്ഷമായ വയനാട്ടില് കഴിഞ്ഞദിവസം രോഗം സ്ഥിരീകരിച്ച 124 പേര്ക്കും സമ്പര്ക്കത്തിലൂടെയാണ് രോഗബാധയുണ്ടായത്. ഇവരില് 101 പേരും വാളാട് പ്രദേശത്തുള്ളവരാണ്. ഇതുവരെ 215 കേസുകളാണ് ഇവിടെ മാത്രം റിപ്പോര്ട്ട് ചെയ്തത്.വാളാട് നിന്നും സമീപ പ്രദേശങ്ങളിലേക്കും രോഗം വ്യാപിക്കുന്നതും ആശങ്കയുണ്ടാക്കുന്നു.