Listen live radio
പെട്ടിമുടി ദുരന്ത ഭൂമി മുഖ്യമന്ത്രിയും ഗവര്ണറും സന്ദര്ശിച്ചു: മൂന്നാറില് ഉന്നതതലയോഗം…
ഇടുക്കി: മുഖ്യമന്ത്രി പിണറായി വിജയനും ഗവര്ണര് ആരിഫ് മുഹമ്മദ് ഖാനും പെട്ടിമുടി ദുരന്തഭൂമി സന്ദര്ശിച്ചു. തൊഴിലാളികളുമായി ഇരുവരും സംസാരിച്ചു. മൂന്നാറില് തിരിച്ചെത്തുന്ന മുഖ്യമന്ത്രി ടി കൗണ്ടി റിസോര്ട്ടില് ഉന്നതതല യോഗത്തില് പങ്കെടുക്കും. മന്ത്രിമാരായ ഇ.ചന്ദ്രശേഖരന്, എം.എം മണി, ടി.പി രാമകൃഷ്ണന്, ഡീന് കുര്യാക്കോസ് എംപി, എംഎല്എമാരായ എസ്.രാജേന്ദ്രന്, ഇ.എസ് ബിജിമോള്, ഡിജിപി ലോക്നാഥ് ബഹ്റ, ദക്ഷിണമേഖല റേഞ്ച് ഐജി ഹര്ഷിത അട്ടല്ലൂരി, ഐജി യോഗേഷ് അഗര്വാള്, ജില്ലാ കളക്ടര് എച്ച് ദിനേശന്, എസ്പി ആര്. കറുപ്പസ്വാമി എന്നിവരും ഒപ്പമുണ്ട്.
വ്യാഴാഴ്ച രാവിലെ മൂന്നാര് ആനച്ചാലില് ഹെലികോപ്റ്ററിലെത്തിയ മുഖ്യമന്ത്രിയും ഗവര്ണറും റോഡ് മാര്ഗമാണ് പെട്ടിമുടിയില് എത്തിയത്. വൈദ്യുതിമന്ത്രി എം.എം. മണിയും എംഎല്എ കെ.കെ. ജയചന്ദ്രനും ഉദ്യോഗസ്ഥരും ചേര്ന്നാണ് ഇവരെ ആനച്ചാലില് സ്വീകരിച്ചത്. ഇവിടെ നിന്ന് 40 കിലോമീറ്റര് റോഡ് മാര്ഗം യാത്ര ചെയ്താണ് സംഘം ദുരന്തഭൂമിയില് എത്തിയത്.
രാജമലയിലെ പഴയ തേയില കമ്പനിക്ക് സമീപം കാത്തു നിന്ന തൊഴിലാളികളുടെ പ്രശ്നങ്ങള് കേള്ക്കുന്നതിനായി മൂന്നാര് ടി കൗണ്ടിയിലേക്ക് കൊണ്ടുവരാന് മുഖ്യമന്ത്രി നിര്ദേശം നല്കി. മൂന്നാറിലെ അവലോകന യോഗത്തിന് ശേഷം മുഖ്യമന്ത്രി മാധ്യമങ്ങളെ കാണും. ഉച്ചകഴിഞ്ഞ് രണ്ടോടെ തിരുവനന്തപുരത്തേക്ക് തിരിക്കും.പെട്ടിമുടി ദുരന്തത്തില് മരിച്ച 55 പേരുടെ മൃതദേഹങ്ങള് ഇതുവരെ കണ്ടെത്തി. 15 പേരെയാണ് ഇനി കണ്ടെത്താനുള്ളത്.