Listen live radio
അധ്യയനമില്ല, പരീക്ഷയില്ല; സീറോ അക്കാദമിക് വര്ഷം ചര്ച്ചയില്- മുഖ്യമന്ത്രി
തിരുവനന്തപുരം: ക്ലാസുകള് ഉടനെ തുടങ്ങാവുന്ന സാഹചര്യം സംജാതമായിട്ടില്ലെന്നു മുഖ്യമന്ത്രി. അടുത്ത അക്കാദമിക വര്ഷം സീറോ അക്കാദമിക് വര്ഷം ആക്കണമെന്ന ചര്ച്ച ദേശീയതലത്തില് ഉയര്ന്നുവരുന്നുണ്ടെന്നും യുജിസി ഇത് സംബന്ധിച്ച് അന്തിമ തീരുമാനം എടുത്തിട്ടില്ലെന്നും അദ്ദേഹം വ്യക്തമാക്കി.
സാമൂഹ്യ അകലം പാലിച്ചുകൊണ്ട് ക്ലാസുകള് നടത്താവുന്ന സാഹചര്യമില്ല. ഷിഫ്റ്റ് അടിസ്ഥാനത്തില് ക്ലാസുകള് ആരംഭിക്കാമെന്ന നിര്ദേശം ചില കോണുകളില്നിന്ന് വന്നിട്ടുണ്ട്. ഓണ്ലൈന് രീതികളും തുടരേണ്ടിവരും. സുരക്ഷയും വിദ്യാഭ്യാസവുമാണു സംസ്ഥാന സര്ക്കാരിന്റെ മുന്ഗണന. ഇതില് സുരക്ഷയ്ക്കാണു പ്രഥമ പരിഗണനയെന്നും മുഖ്യമന്ത്രി പറഞ്ഞു.
അധ്യയനവും പരീക്ഷയും ഒഴിവാക്കുന്ന രീതിയാണ് സീറോ അക്കാദമിക് വര്ഷം എന്നുദേശിക്കുന്നത്. കോവിഡ് പശ്ചാത്തലത്തില് സംസ്ഥാനത്തെ മിക്ക സര്വകലാശാലകളിലും കോളജുകളിലും കഴിഞ്ഞ സെമസ്റ്ററുകളുടെ അവസാന ഭാഗങ്ങള് ഓണ്ലൈന് വഴിയാണ് പൂര്ത്തിയാക്കിയതെന്നും അദ്ദേഹം ചൂണ്ടിക്കാട്ടി.