തിരുവനന്തപുരം കോർപ്പറേഷനിലെ നികുതി തട്ടിപ്പ്: നഗരസഭയുടെ ഭരണം തകർക്കാൻ ലക്ഷ്യമിട്ടുള്ള ഗൂഢാലോചനയെന്ന് മേയർ

തിരുവനന്തപുരം: തിരുവനന്തപുരം കോർപ്പറേഷനിലെ നികുതി വെട്ടിപ്പിൽ പ്രതികരിച്ച് മേയർ ആര്യ രാജേന്ദ്രൻ. നികുതി തട്ടിപ്പിൽ പരിഭ്രാന്തർ ആവേണ്ടതില്ലെന്നും ജനത്തിന് നഷ്ടം സംഭവിച്ചിട്ടില്ലെന്നും മേയർ പറഞ്ഞു. നഗരസഭയ്ക്ക് വന്ന നഷ്ടം തട്ടിപ്പ് നടത്തിയ ഉദ്യോഗസ്ഥരിൽ നിന്ന് തിരിച്ച് പിടിക്കുന്നത് പരിഗണനയിലുണ്ട്. നികുതി വരവ് വച്ചിട്ടുണ്ടോയെന്ന് ജനം നേരിട്ട് നഗരസഭയിൽ എത്തി പരിശോധിക്കണമെന്ന് പ്രചാരണം നടക്കുന്നുണ്ട്. എന്നാൽ, ഇതെല്ലം നഗരസഭ ഭരണം തകർക്കാൻ ലക്ഷ്യമിട്ടുള്ള ഗൂഢാലോചന ആണെന്നും മേയർ പറഞ്ഞു.

തിരുവനന്തപുരം കോർപ്പറേഷനിൽ വീടിന്റെ കരം ഉൾപ്പടെയുള്ള നികുതി പിരിക്കുന്നതിൽ വ്യാപക ക്രമക്കേടാണ് കണ്ടെത്തിയിരിക്കുന്നത്. തിരുവനന്തപുരം കോർപ്പറേഷനിലെ നേമം, ശ്രീകാര്യം, ആറ്റിപ്ര സോണുകളിൽ വീടിന്റെ കരം അടച്ച 30 ലക്ഷത്തിലേറെ രൂപ ഉദ്യോഗസ്ഥർ തിരിമറി നടത്തിയെന്ന് ഓഡിറ്റ് വിഭാഗമാണ് കണ്ടെത്തിയത്.

ഇതോടെ 25 ലക്ഷത്തിൻറെ തിരിമറി നടന്ന നേമം സോണിലെ സൂപ്രണ്ട് എസ് ശാന്തി അടക്കം അഞ്ച് ഉദ്യോഗസ്ഥരെ സസ്‌പെൻറ് ചെയ്തു. നികുതി തട്ടിപ്പിൽ കൗൺസിൽ ഹാളിൽ ബിജെപി സമരം തുടരുകയാണ്. കുറ്റക്കാരായ ഉദ്യോഗസ്ഥരെ അറസ്റ്റ് ചെയ്യാതെ സമരം അവസാനിപ്പിക്കില്ലെന്നാണ് ബിജെപി പറയുന്നത്.