കാൺപൂർ∙ ബലം പ്രയോഗിച്ച് തന്നെ ചുംബിച്ച മുൻ കാമുകന്റെ നാക്ക് കടിച്ചുമുറിച്ച് യുവതി. ഉത്തർപ്രദേശിലെ കാൺപൂരിലാണ് സംഭവം. 35കാരനായ ചംപി എന്നയാളുടെ നാക്കാണ് മുൻ കാമുകി കടിച്ചുമുറിച്ചത്. ഇയാൾ വിവാഹിതനാണ്.
യുവതിയുടെ വിവാഹം മറ്റൊരാളുമായി ഉറപ്പിച്ചതിൽ ചംപി അസ്വസ്ഥനായിരുന്നു. വിവാഹനിശ്ചയത്തിന് പിന്നാലെ യുവതി ചംപിയിൽ നിന്ന് അകന്നു. ഇത് ചംപിയെ ദുഃഖിതനാക്കിയിരുന്നു. യുവതിയെ കാണാനും ഇയാൾ ഇടയ്ക്ക് ശ്രമിച്ചിരുന്നു. എന്നാൽ യുവതി അതിന് തയാറായിരുന്നില്ല.
തിങ്കളാഴ്ച ഉച്ചയ്ക്ക് കളിമണ്ണ് ശേഖരിക്കാനായി കുളത്തിന് സമീപത്തേയ്ക്ക് ഒറ്റയ്ക്ക് പോവുകയായിരുന്ന യുവതിയെ ചംപി പിന്തുടർന്നു. അവിടെ വച്ച് അയാൾ അവളെ കടന്ന് പിടിക്കുകയും പീഡിപ്പിക്കാൻ ശ്രമിക്കുകയും ചെയ്തു. യുവതി ഇയാളെ തള്ളിമാറ്റിയെങ്കിലും ബലം പ്രയോഗിച്ച് ചംപി യുവതിയെ ചുംബിച്ചു. പിന്നാലെയാണ് യുവതി മുൻ കാമുകന്റെ നാക്ക് കടിച്ചു മുറിച്ചത്.
വേദന കൊണ്ട് പുളഞ്ഞ ചംപി ഉറക്കെ നിലവിളിച്ചു. ഇതുകേട്ട് ഓടിവന്ന നാട്ടുകാരും ബന്ധുക്കളും ചേർന്നാണ് അയാളെ ആശുപത്രിയിലെത്തിച്ചത്. സംഭവത്തിന് പിന്നാലെ യുവതി പീഡിപ്പിക്കാൻ ശ്രമിച്ചതിന് ചംപിക്കെതിരെ പൊലീസ് കേസ് റജിസ്റ്റർ ചെയ്തു.
