മുംബൈ: പ്രമുഖ വാഹന നിര്മ്മാതാക്കളായ മാരുതി സുസുക്കിയുടെ പ്രമുഖ മോഡലായ ബ്രെസ്സയുടെ പുതുക്കിയ 2026 പതിപ്പ് ഉടന് വിപണിയില്. ഈ സബ്-കോംപാക്റ്റ് എസ്യുവിയുടെ ചിത്രങ്ങള് ഇപ്പോള് പുറത്തുവന്നിട്ടുണ്ട്. ഡിസൈനിലെ മാറ്റങ്ങള് വളരെ കുറവാണെന്നാണ് ചിത്രങ്ങള് വ്യക്തമാക്കുന്നത്.
പുതുക്കിയ ബ്രെസ്സയ്ക്ക് ഡ്യുവല്-ടോണ് അലോയ് വീലുകള്ക്കായി പുതിയൊരു ഡിസൈന് ലഭിക്കും. ബോഡി കളറിലുള്ള ഡോര് ഹാന്ഡിലുകള്, ചതുരാകൃതിയിലുള്ള വീല് ക്ലാഡിങ്, ബ്ലാക്ക്-ഔട്ട് ഫിനിഷിലുള്ള പില്ലറുകളും റൂഫും എന്നിവ ഈ മോഡലിലും തുടരും. വശങ്ങളിലെ ക്ലാഡിംഗില് ബ്രഷ്ഡ് സില്വര് ഇന്സെര്ട്ടുകള് കാണാമെങ്കിലും, ഇത് ഒരുപക്ഷേ ഒരു ആക്സസറി ആകാനാണ് സാധ്യത. മുന്വശത്തെ ബമ്പറിലും ചെറിയ മാറ്റങ്ങള് വരുത്തിയിട്ടുണ്ടെന്ന് തോന്നുമെങ്കിലും ഇതിന്റെ കൃത്യമായ വിവരങ്ങള് ഇപ്പോഴും പുറത്തുവിട്ടിട്ടില്ല.
എന്ജിന്റെ കാര്യത്തിലേക്ക് വരികയാണെങ്കില്, പുതിയ ബ്രെസ്സയില് 1.0-ലിറ്റര് ബൂസ്റ്റര്ജെറ്റ് ടര്ബോ-പെട്രോള് എന്ജിനും സിക്സ്-സ്പീഡ് മാനുവല് ഗിയര്ബോക്സും ഉണ്ടായേക്കുമെന്നാണ് സൂചനകള്. അടിഭാഗത്തായി സജ്ജീകരിച്ച നിലയില് ഒരു സിഎന്ജി കിറ്റും ഇതിലുണ്ടാകുമെന്ന് പ്രതീക്ഷിക്കുന്നു. പുതിയ എല്ഇഡി ടെയില്ലൈറ്റുകള്, അഡാസ് (ADAS), പുതിയ അപ്ഹോള്സ്റ്ററി, 360-ഡിഗ്രി കാമറ, കൂടുതല് വലിപ്പമുള്ള ടച്ച്സ്ക്രീന് ഇന്ഫോടെയ്ന്മെന്റ് സിസ്റ്റം എന്നിവയാകാം ബ്രെസ്സയുടെ മറ്റു ഫീച്ചറുകള്.
