മാനന്തവാടി: മാനന്തവാടി ടൗണിൽ റോഡരികിൽ വാഹനം നിർത്തിയിടുന്നവർക്ക് പോലീസ് പിഴ ചുമത്തുന്ന നടപടിക്കെതിരെ വ്യാപക പ്രതിഷേധം. മെഡിക്കൽ ഷോപ്പിൽ നിന്ന് മരുന്ന് വാങ്ങാനോ മറ്റ് അത്യാവശ്യങ്ങൾക്കോ വേണ്ടി അൽപ്പസമയം വാഹനം ഒതുക്കിനിർത്താൻ പോലും സാധിക്കുന്നില്ലെന്ന് നാട്ടുകാർ പരാതിപ്പെടുന്നു.
ആശുപത്രി ആവശ്യങ്ങൾക്കോ മറ്റോ ടൗണിലെത്തി മടങ്ങുമ്പോഴേക്കും, വാഹനത്തിന്റെ ഫോട്ടോയെടുത്ത് പിഴ ചുമത്തുന്നതായി നിരവധി പേർ പരാതിപ്പെട്ടു. റോഡിന് ആവശ്യത്തിന് വീതിയുണ്ടായിട്ടും, ഇന്റർലോക്ക് പതിച്ച ഭാഗത്ത് സ്കൂട്ടറുകൾ പോലുള്ള ചെറിയ വാഹനങ്ങൾ ഒതുക്കിനിർത്താൻ പോലും അനുവദിക്കാതെ പിഴ ഈടാക്കുകയാണെന്ന് വ്യാപാരികളും ആരോപിക്കുന്നു.
ട്രാഫിക് പോലീസും ഹോം ഗാർഡുകളും മൊബൈൽ ഫോണിൽ ഫോട്ടോയെടുത്ത് പിഴ ചുമത്തുന്നതാണ് പ്രധാന പ്രതിഷേധത്തിന് കാരണം. ടൗണിൽ ആവശ്യത്തിന് പാർക്കിംഗ് സൗകര്യം ഒരുക്കാതെ ജനങ്ങളെ ബുദ്ധിമുട്ടിക്കുന്ന ഈ നടപടിക്കെതിരെ ജനകീയ പ്രക്ഷോഭം സംഘടിപ്പിക്കേണ്ടി വരുമെന്ന് മർച്ചന്റ്സ് അസോസിയേഷൻ ഉൾപ്പെടെയുള്ളവർ മുന്നറിയിപ്പ് നൽകി.
