നാസിക് ∙ മഹാരാഷ്ട്രയിലെ നാസിക്കിൽ ജ്വല്ലറി കൊള്ളയടിക്കാൻ കവർച്ചാസംഘം നടത്തിയ ശ്രമം കടയിലെ ജീവനക്കാർ പരാജയപ്പെടുത്തി. നാസിക്കിലെ ഹിരാവാടിയിലുള്ള ‘ന്യൂ സമൃദ്ധി ജ്വല്ലേഴ്സി’ലേക്ക് ഇന്നലെ രാത്രി 9 മണിയോടെ മുഖംമൂടി ധരിച്ച കവർച്ചക്കാർ തോക്കുമായി അതിക്രമിച്ചു കയറുകയായിരുന്നു.
മൂന്ന് ജീവനക്കാർ ജോലി ചെയ്തുകൊണ്ടിരുന്ന കടയിലേക്ക് നാല് പേർ പ്രവേശിക്കുന്നത് സിസിടിവി ദൃശ്യങ്ങളിൽ കാണാം. ഇവർ തലയിൽ തൊപ്പിയും മുഖത്ത് മാസ്കും ധരിച്ചിരുന്നു. പ്രതികളിൽ ഒരാൾ ഹെൽമറ്റും ധരിച്ചിട്ടുണ്ടായിരുന്നു. കടയ്ക്കുള്ളിൽ പ്രവേശിച്ച ഉടൻ തന്നെ കവർച്ചക്കാരിൽ ഒരാൾ തോക്കെടുത്ത് ജീവനക്കാർക്ക് നേരെ ചൂണ്ടി.
ഒരു ജീവനക്കാരൻ ഒളിക്കാൻ ശ്രമിച്ചപ്പോൾ മറ്റ് രണ്ട് ജീവനക്കാർ കവർച്ചക്കാരെ ധീരമായി നേരിട്ടു. ശക്തമായി പ്രതിരോധിച്ചതോടെ കവർച്ചക്കാർക്ക് കടയിൽനിന്ന് ഓടി രക്ഷപ്പെടേണ്ടി വന്നു. ജീവനക്കാരിൽ ഒരാളുടെ തലയിൽ തോക്കിന്റെ പിൻഭാഗം കൊണ്ട് അടിയേറ്റു. ആക്രമണത്തിൽ ഗുരുതരമായി പരുക്കേറ്റ ഈ ജീവനക്കാരനെ ആശുപത്രിയിൽ പ്രവേശിപ്പിച്ചു. പ്രതികൾക്കായി പൊലീസ് അന്വേഷണം ആരംഭിച്ചു.
