എല്ലാ വർഷവും ഒക്ടോബർ 28 അന്താരാഷ്ട്ര ആനിമേഷൻ ദിനമായി (International Animation Day) ആചരിക്കുന്നു. സിനിമയുടെയും കലയുടെയും ലോകത്ത് വിസ്മയങ്ങൾ തീർക്കുന്ന ആനിമേഷൻ സാങ്കേതികവിദ്യയുടെ ചരിത്രവും പ്രാധാന്യവും ഓർമ്മിപ്പിക്കുന്നതിനാണ് ഈ ദിവസം മാറ്റിിവെച്ചിരിക്കുന്നത്.
അസോസിയേഷൻ ഇന്റർനാഷണൽ ഡി ഫിലിം ഡി ആനിമേഷൻ (ASIFA) ആണ് 2002-ൽ അന്താരാഷ്ട്ര ആനിമേഷൻ ദിനത്തിന് തുടക്കമിട്ടത്. 1892 ഒക്ടോബർ 28-ന് ചാൾസ് റെയ്നോഡ് പാരീസിൽ തന്റെ ‘ഒപ്റ്റിക്കൽ തിയേറ്റർ’ വഴി ആദ്യമായി ആനിമേഷൻ ചലച്ചിത്രങ്ങൾ പ്രദർശിപ്പിച്ചതിന്റെ ഓർമ്മയ്ക്കായാണ് ഈ തീയതി തിരഞ്ഞെടുത്തത്. ചലച്ചിത്ര ചരിത്രത്തിൽ ആനിമേഷന്റെ ആദ്യ ഔദ്യോഗിക പ്രദർശനമായിരുന്നു അത്.
മക്കളെയും മുതിർന്നവരെയും ഒരുപോലെ വിസ്മയിപ്പിക്കുന്ന ഒന്നാണ് ആനിമേഷൻ. വെറുമൊരു വിനോദോപാധി എന്നതിലുപരി, ആശയവിനിമയത്തിനുള്ള ശക്തമായൊരു മാധ്യമമാണ് ഇന്ന് ആനിമേഷൻ. പരസ്യങ്ങൾ, സിനിമകൾ, വിദ്യാഭ്യാസ രംഗം, ഗെയിമിംഗ് തുടങ്ങി വിവിധ മേഖലകളിൽ ആനിമേഷന്റെ സ്വാധീനം വളരെ വലുതാണ്.
ലോകമെമ്പാടുമുള്ള ആനിമേഷൻ കലാകാരന്മാരെയും സാങ്കേതിക വിദഗ്ധരെയും ആദരിക്കുന്നതിനും ഈ കലാരൂപത്തെ ജനങ്ങളിലേക്ക് കൂടുതൽ എത്തിക്കുന്നതിനുമാണ് ഈ ദിനത്തിൽ വിവിധ പരിപാടികൾ സംഘടിപ്പിക്കുന്നത്.
ചലച്ചിത്ര പ്രദർശനങ്ങൾ, ശിൽപ്പശാലകൾ, പ്രത്യേക സെമിനാറുകൾ എന്നിവയുടെ ഭാഗമായി ലോകത്തിന്റെ പല ഭാഗങ്ങളിലും ഈ ദിനം ആഘോഷിക്കപ്പെടുന്നു.
നിശ്ചലമായ ചിത്രങ്ങൾക്ക് ചലനവും ഭാവവും നൽകി കാഴ്ചക്കാരെ മറ്റൊരു ലോകത്തേക്ക് കൂട്ടിക്കൊണ്ടുപോകുന്ന ആനിമേഷന്റെ മാസ്മരികതയെ ആഘോഷിക്കാനാണ് ഈ ദിനം നമുക്ക് മുന്നിലെത്തുന്നത്.
ആഗോളതലത്തിൽ പൊതുവായ തീം ഈ ദിനാചരണത്തോടനുബന്ധിച്ച് ഇല്ലെങ്കിലും, വിവിധ രാജ്യങ്ങളിലെ ആനിമേഷൻ കൂട്ടായ്മകൾ തങ്ങളുടേതായ തീമുകൾ ഈ ദിനത്തിൽ മുന്നോട്ട് വെക്കാറുണ്ട്. മിക്ക രാജ്യങ്ങളും ഈ വർഷത്തെ തങ്ങളുടെ ആഘോഷങ്ങൾക്കായി “അതിരുകൾക്കപ്പുറം: അനേകം ശബ്ദങ്ങൾ, ഒരൊറ്റ ഭാവി” (Beyond Borders: Many Voices, One Future) എന്ന തീം ആണ് നിശ്ചയിച്ചിരിക്കുന്നത്.
mkp
