Listen live radio
ക്വാറന്റൈന്‍ ലംഘനം: പൊലീസ് മിന്നല്‍ പരിശോധനയ്ക്ക്, ജില്ലാ പൊലീസ് മേധാവിമാര്‍ക്ക് ഡിജിപി നിര്‍ദേശം നല്‍കി
- Advertisement -
തിരുവനന്തപുരം: സംസ്ഥാനത്ത് കോവിഡ് ബാധിതരുടെ എണ്ണം കൂടുന്ന പശ്ചാത്തലത്തില്‍ പരിശോധനകള്‍ കര്‍ക്കശമാക്കാന്‍ പൊലീസ്. ക്വാറന്റൈന്‍ ലംഘനം തടയുന്നതിനു മിന്നല്‍ പരിശോധനകള്‍ നടത്താന്‍ ജില്ലാ പൊലീസ് മേധാവിമാര്‍ക്ക് ഡിജിപി നിര്‍ദേശം നല്‍കി. വാഹന പരിശോധന ശക്തമാക്കാനും നിര്‍ദേശമുണ്ട്.
വിദേശത്തുനിന്നും മറ്റു സംസ്ഥാനങ്ങളില്‍നിന്നും കൂടുതല്‍ പേര്‍ എത്തുന്നതിനാല്‍ സംസ്ഥാനത്ത് സമീപ ദിവസങ്ങളില്‍ കോവിഡ് ബാധിതരുടെ എണ്ണത്തില്‍ വന്‍ വര്‍ധനയാണ് ഉണ്ടായത്. വിദേശത്തു നിന്ന് എത്തുന്നവരെയും ഇതര സംസ്ഥാനങ്ങളില്‍നിന്നു വരുന്നവരെയും റൂം ക്വാറന്റൈന്‍ നിര്‍ദേശിച്ച് വീടുകളിലേക്ക് അയയ്ക്കുകയാണ് ചെയ്യുന്നത്. ഇവരില്‍ പലരും ക്വാറന്റൈന്‍ ലംഘിക്കുകയാണെന്ന റിപ്പോര്‍ട്ടുകളുടെ പശ്ചാത്തലത്തിലാണ് പൊലീസ് നടപടി.
സമീപ ദിവസങ്ങളില്‍ പലയിടത്തു നിന്നും ക്വാറന്റൈന്‍ ലംഘനങ്ങള്‍ റിപ്പോര്‍ട്ട് ചെയ്യപ്പെട്ടിരുന്നു. പുറത്തുനിന്ന് എത്തുന്നവരില്‍ കുറെപ്പേരെങ്കിലും വൈറസ് വാഹകരാണ് എന്നാണ് ഇതുവരെയുള്ള അനുഭവം. അതുകൊണ്ട് ഇവര്‍ പുറത്തിറങ്ങി മറ്റുള്ളവരോട് ഇടപെടുന്നത് വൈറസ് വ്യാപനം കൂടാന്‍ ഇടയാക്കും എന്നാണ് ആരോഗ്യ വിദഗ്ധര്‍ മുന്നറിയിപ്പു നല്‍കുന്നത്.
