കളഞ്ഞുകിട്ടിയ 3 ലക്ഷം രൂപ തിരികെ നൽകി ലോട്ടറിത്തൊഴിലാളി

കൂത്തുപറമ്പ് ∙ റോഡിൽ നിന്ന് കളഞ്ഞു കിട്ടിയ 3 ലക്ഷം രൂപ ലോട്ടറിത്തൊഴിലാളി തിരികെ നൽകി. കൂത്തുപറമ്പ് ടൗണിൽ ലോട്ടറി തൊഴിലാളിയായ നരവൂരിലെ സി.സുബീഷിനാണ് പണം കളഞ്ഞു കിട്ടിയത്. കൂത്തുപറമ്പ് സഹ.റീജനൽ ബാങ്ക് ജീവനക്കാരൻ സി.വി.ജിതേഷിന്റെ പണമാണ് കാർ യാത്രയ്ക്കിടെ നഷ്ടപ്പെട്ടത്. ആലക്കണ്ടി കോംപ്ലക്സിന് സമീപം കാർ നിർത്തി സുഹൃത്തുമായി സംസാരിച്ചിരുന്നു. ഇതിനിടെ കാറിന്റെ ഡോർ തുറന്നടച്ചിരുന്നു. ഡോർ തുറന്നപ്പോൾ സഞ്ചിയിൽ പൊതിഞ്ഞ് സീറ്റിൽ വച്ച പണം താഴെ വീണത് ശ്രദ്ധിച്ചിരുന്നില്ല. വീണുകിട്ടിയ പണം സുബീഷ് കൂത്തുപറമ്പ് പൊലീസിൽ ഏൽപിച്ചിരുന്നു. അന്വേഷിച്ച് എത്തിയ ജിതേഷിന് പൊലീസ് സ്റ്റേഷനിൽ വച്ച് സുബീഷ് പണം കൈമാറി.