താമരശ്ശേരി ചുരം ആറാം വളവിന് സമീപം ടാക്സി ഇന്നോവ കാറിന് മുകളിലേക്ക് മരം വീണുണ്ടായ അപകടത്തെത്തുടർന്ന് തടസ്സപ്പെട്ട ഗതാഗതം പൂർണ്ണമായും പുനഃസ്ഥാപിച്ചു. അപകടത്തിൽ കാറിലുണ്ടായിരുന്ന ഒരു കുട്ടിക്ക് പരിക്കേറ്റിട്ടുണ്ട്. കുട്ടിയെ ഉടൻ തന്നെ കോഴിക്കോട് മൈത്ര ഹോസ്പിറ്റലിലേക്ക് മാറ്റി. കൽപ്പറ്റയിൽ നിന്നെത്തിയ ഫയർഫോഴ്സ് സംഘം, ചുരത്തിലെ സന്നദ്ധപ്രവർത്തകർ, ഹൈവേ പോലീസ്, യാത്രക്കാർ എന്നിവർ സംയുക്തമായി നടത്തിയ പ്രവൃത്തിക്കൊടുവിലാണ് റോഡിലെ തടസ്സം നീക്കിയത്. വീണ മരം മുറിച്ചുമാറ്റുകയും അപകടത്തിൽപ്പെട്ട കാർ സംഭവസ്ഥലത്തുനിന്ന് മാറ്റുകയും ചെയ്തതോടെയാണ് പാത വീണ്ടും ഗതാഗതയോഗ്യമായത്.നിലവിൽ ചുരത്തിൽ മറ്റു ഗതാഗത തടസ്സങ്ങളോ പ്രതിസന്ധികളോ ഇല്ലെന്ന് അധികൃതർ അറിയിച്ചു. എന്നാൽ, അപകടത്തെത്തുടർന്ന് ദീർഘനേരം വണ്ടികൾ വഴിയിൽ കിടക്കേണ്ടി വന്നതിനാൽ വലിയ രീതിയിലുള്ള വാഹനത്തിരക്ക് ഇപ്പോഴും അനുഭവപ്പെടുന്നുണ്ട്. ഈ കുടുങ്ങിക്കിടന്ന വാഹനങ്ങൾ ഒഴിഞ്ഞുമാറുന്നതിനനുസരിച്ച് ചുരത്തിലെ ഗതാഗതം വൈകാതെ തന്നെ പൂർണ്ണമായും സാധാരണ നിലയിലാകും.
