ഇന്ന് ചിങ്ങം ഒന്ന്; ചിങ്ങമറിഞ്ഞില്ല ഇത് കൊവിഡ് കാലമാണെന്ന്

കല്‍പ്പറ്റ: ഇന്ന് ചിങ്ങം ഒന്ന്. മലയാളികള്‍ അറി‍ഞ്ഞില്ല ഇന്ന് പുതുവര്‍ഷാരംഭമാണെന്ന്. ലോകമെങ്ങും കൊവിഡ് ഭീതിയിലാണ്. മലയാളത്തിന്റെ പുതുവര്‍ഷാരംഭമാണ് ചിങ്ങപിറവി. കര്‍ക്കിടകത്തിന്റെ വറുതികളെ മറന്ന് കാര്‍ഷിക വിളവെടുപ്പിന്റെയും സമൃദ്ധിയുടെയും നാളുകളാണ് ഇനി മലയാളികള്‍ക്ക്. പഞ്ഞമാസമായ കര്‍ക്കിടകത്തിന് വിട. ഇനി സമ്പല്‍ സമൃദ്ധിയുടെ പൊന്നിന്‍ ചിങ്ങപുലരിയിലേക്ക്.
ഞാറ്റുപാട്ടിന്റെയും കൊയ്ത്തുപാട്ടിന്റെയും ഈരടികള്‍ ഒരേസമയം ഉയരുന്ന മാസം. വിളഞ്ഞ് നില്ക്കുന്ന നെന്മണികളാല്‍ പറ നിറയുന്ന കാലം. ഉത്സവകാലം കൂടിയാണ് ചിങ്ങം. ഓണത്തിന്റെ വരവറിയിച്ച് പ്രകൃതിയില്‍ വസന്തം വിരിയും. കുട്ടിക്കൂട്ടങ്ങളുടെ പൂപ്പാട്ടിന്റെ താളത്തില്‍ ഇനി പൂമുറ്റങ്ങള്‍ ഒരുങ്ങേണ്ട ദിനങ്ങളാണ്.
ഒരു കാലത്തെ കാര്‍ഷിക പാരമ്പര്യത്തെ ഓര്‍മ്മപ്പെടുത്തി കര്ഷക ദിനം കൂടിയാണ് ചിങ്ങം ഒന്ന്. കാലവും, കാലാവസ്ഥയും മാറിയെങ്കിലും കാര്‍ഷിക സ്വയം പര്യാപ്തതയിലേക്ക് കേരളം വീണ്ടും അടുക്കുന്നു എന്നതാണ് ഈ ചിങ്ങ പുലരിയിലെ പ്രതീക്ഷ.
ദിനരാത്രങ്ങൾ മിന്നി മായുന്നു, വസന്ത ഹേമന്ത ഗ്രീഷ്മ ശിശിരങ്ങൾ ഒരു പുതുവർഷത്തിനായിയി സ്വാഗതമോതുന്നു ഈ പുതുവർഷം എല്ലാവര്‍ക്കും ഹർൃദ്യവും പുതുമ നിറഞ്ഞതുമാകട്ടെ…
വയനാട് ന്യൂസ് ഡെയിലിയുടെ എല്ലാ വായനക്കാര്‍ക്കും പുതുവല്‍സര ആശംസകള്‍ നേരുന്നു.