കൽപറ്റ: മണ്ഡലത്തിൽ യു.ഡി.എഫ് സ്ഥാനാർഥി ടി. സിദ്ദീഖിനും എൽ.ഡി.എഫിന്റെ പി.കെ. അനിൽകുമാറിനുമെതിരെ അപരൻമാർ. സ്വതന്ത്രനായി പത്രിക സമർപ്പിച്ച പൊഴുതന കരിയാട്ടുപൊഴിയിൽ സിദ്ദീഖാണ് യു.ഡി.എഫ് സ്ഥാനാർഥിയുടെ അപരൻ. 64 വയസ്സുള്ള ഇദ്ദേഹം തിങ്കളാഴ്ചയാണ് പത്രിക നൽകിയത്. എൽ.ഡി.എഫ് സ്ഥാനാർഥി അനിൽകുമാറിന്റെ അതേ പേരിൽ തന്നെയുള്ള മറ്റൊരു അനിൽകുമാറാണ് സ്വതന്ത്രനായി പത്രിക നൽകിയ രണ്ടാമത്തെയാൾ. മേപ്പാടി കുന്നമ്പറ്റ കോട്ടപ്പടി കാർത്തിക എസ്റ്റേറ്റ് വിലാസത്തിലുള്ള ഇദ്ദേഹത്തിന് 52 വയസ്സുണ്ട്. സുൽത്താൻ ബത്തേരി മണ്ഡലത്തിൽ ലഭിച്ച 14 പത്രികകളിൽ യു.ഡി.എഫ് സ്ഥാനാർഥി ഐ.സി. ബാലകൃഷ്ണനും അപരനുണ്ട്. അമ്പലവയൽ എടക്കൽ വീട്ടിൽ താമസിക്കുന്ന 58 വയസ്സുള്ള ഇ. ബാലകൃഷ്ണനാണ് ഇവിടെ സ്വതന്ത്രനായി പത്രിക സമർപ്പിച്ചത്. അതേസമയം ബത്തേരിയിൽ എൽ.ഡി.എഫ് സ്ഥാനാർഥി എം.എസ്. വിശ്വനാഥന് അപര ശല്യമില്ല. 13 പത്രികകൾ ലഭിച്ച മാനന്തവാടി മണ്ഡലത്തിൽ എൽ.ഡി.എഫിന്റെ ഒ.ആർ. കേളുവിനോ യു.ഡി.എഫിന്റെ ഉഷ വിജയനോ അപരൻമാരുടെ ഭീഷണിയില്ല.
