പരീക്ഷകളിൽ മികച്ച വിജയം നേടുന്നതിന് ദിവസങ്ങളോളം നീളുന്ന കഠിനമായ പഠനരീതികൾ ആവശ്യമില്ലെന്ന് തെളിയിക്കുകയാണ് പത്താം ക്ലാസ് പരീക്ഷയിൽ 99.2 ശതമാനം മാർക്ക് കരസ്ഥമാക്കിയ സാൻവി ലധ. അമിതമായ പഠനഭാരത്തേക്കാൾ സ്മാർട്ട് ആയ പഠനരീതികളും ജീവിതത്തിലെ സന്തുലിതാവസ്ഥയുമാണ് വിജയത്തിന് കാരണമെന്ന് സാൻവി പറയുന്നു. സോഷ്യൽ മീഡിയയിലൂടെ താൻ പിന്തുടർന്ന അഞ്ച് പ്രധാന പഠനരീതികൾ കൂടി പങ്കുവെക്കുകയാണ് സാൻവി.പരീക്ഷാ വിജയത്തിനുള്ള സാൻവിയുടെ അഞ്ച് പഠനരീതികൾസ്ഥിരതയുള്ള പഠനം: ദിവസവും 12ഉം 15ഉം മണിക്കൂർ പഠിക്കുന്നതിനേക്കാൾ പ്രധാനം കൃത്യമായ ഇടവേളകളിൽ പഠിക്കുക എന്നതാണ്. പഠനത്തിന്റെ ഗുണനിലവാരമാണ് മണിക്കൂറുകളേക്കാൾ പ്രധാനം. തുടക്കം മുതൽ തന്നെ കൃത്യമായ ശീലങ്ങൾ വളർത്തിയെടുക്കുന്നത് പരീക്ഷാസമയത്ത് സമ്മർദ്ദമില്ലാതെ മുന്നേറാൻ സഹായിക്കും.ഹോബികൾ ഉപേക്ഷിക്കരുത്: പരീക്ഷാക്കാലം എന്നാൽ വിനോദങ്ങളെല്ലാം വേണ്ടെന്ന് വെക്കാനുള്ള സമയമല്ല. തനിക്ക് ഇഷ്ടപ്പെട്ട കാര്യങ്ങളിൽ ഏർപ്പെടുന്നത് മനസിനെ ഉന്മേഷമുള്ളതാക്കാനും പഠനത്തിൽ കൂടുതൽ ശ്രദ്ധ കേന്ദ്രീകരിക്കാനും സഹായിക്കുമെന്ന് സാൻവി പറയുന്നു.സോഷ്യൽ മീഡിയയുടെ നിയന്ത്രണം: സോഷ്യൽ മീഡിയ പൂർണമായി ഒഴിവാക്കുക എന്നത് പ്രായോഗികമല്ലെങ്കിലും, അതിന്റെ ഉപയോഗത്തിന് പരിധി നിശ്ചയിക്കേണ്ടത് അത്യാവശ്യമാണ്. അമിതമായ ഉപയോഗം ശ്രദ്ധ വ്യതിചലിക്കുന്നതിനും സമയം പാഴാക്കുന്നതിനും കാരണമാകുമെന്ന് സാൻവി ഓർമിപ്പിക്കുന്നു.സ്വയം പഠനത്തിന്റെ പ്രാധാന്യം: അധ്യാപകരും പരിശീലന കേന്ദ്രങ്ങളും വഴികാട്ടികളാണെങ്കിലും, മികച്ച വിജയം നേടാൻ സ്വയം പഠനം അനിവാര്യമാണ്. പാഠഭാഗങ്ങൾ വായിക്കുന്നതും സ്വന്തമായി കുറിപ്പുകൾ തയ്യാറാക്കുന്നതും തെറ്റുകളിൽ നിന്ന് പാഠങ്ങൾ ഉൾക്കൊള്ളുന്നതും പഠനത്തെ കൂടുതൽ കാര്യക്ഷമമാക്കുന്നു.കഠിനാധ്വാനവും സ്ഥിരോത്സാഹവും: വിജയത്തിന് ഊടുവഴികളില്ല. നിരന്തരമായ പരിശ്രമവും ലക്ഷ്യത്തോടുള്ള ആത്മാർഥതയുമാണ് ഏതൊരു വിദ്യാർഥിയെയും വിജയത്തിലെത്തിക്കുക. ഒപ്പം, വീട്ടിൽ നിന്ന് ലഭിക്കുന്ന പിന്തുണയും സമ്മർദ്ദമില്ലാത്ത അന്തരീക്ഷവും ഒരു കുട്ടിയുടെ ആത്മവിശ്വാസം വർധിപ്പിക്കുന്നതിൽ വലിയ പങ്ക് വഹിക്കുന്നുണ്ടെന്നും സാൻവി കൂട്ടിച്ചേർക്കുന്നു.
