മാനന്തവാടി: മാനന്തവാടി നഗരസഭ ആരോഗ്യ വിഭാഗം നടത്തിയ മിന്നൽ പരിശോധനയിൽ വിവിധയിടങ്ങളിൽ നിന്നും പഴകിയ ഭക്ഷണ സാധനങ്ങൾ പിടികൂടി.ആശുപത്രി കാന്റീനുകൾ, ആശുപത്രി പരിസരത്തെ ഹോട്ടലുകൾ എന്നിവിടങ്ങളിൽ നടത്തിയ പരിശോധനയിലാണ് പഴകിയ ചോറ്, മീൻ പൊരിച്ചത്, ചിക്കൻ, മാവ് എന്നിവ കണ്ടെത്തിയത്. ക്ലീൻസിറ്റി മാനേജർ ഇൻചാർജ് എസ്. ഷൈജു, പബ്ലിക് ഹെൽത്ത് ഇൻസ്പെക്ടർമാർ, നഗരസഭ ജീവനക്കാർ എന്നിവരുടെ നേതൃത്വത്തിലായിരുന്നു പരിശോധന. ജനങ്ങളുടെ ആരോഗ്യത്തിന് ഭീഷണിയാകുന്ന രീതിയിൽ പ്രവർത്തിക്കുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്ന് അധികൃതർ മുന്നറിയിപ്പ് നൽകി. വരും ദിവസങ്ങളിലും പരിശോധന തുടരാനാണ് നഗരസഭയുടെ തീരുമാനം.
