മാനന്തവാടി: പ്രായപൂര്‍ത്തിയാവാത്ത കുട്ടിക്ക് വാഹനമോടിക്കാന്‍ നല്‍കിയതില്‍ വാഹന ഉടമയ്ക്കെതിരെ കേസെടുത്തു. ചുണ്ടേല്‍ മങ്ങാട്ടുപറമ്പില്‍ വീട്ടില്‍ മാനുവിനെതിരെയാണ് പോലീസ് കേസെടുത്തത്. നാലാം മൈല്‍ മാനന്തവാടി റോഡില്‍ മാനന്തവാടി ട്രാഫിക് പോലീസിന്റെ വാഹന പരിശോധനക്കിടെ സൈഡ് മിറര്‍ ഇല്ലാത്ത ബൈക്കില്‍ സഞ്ചരിച്ച പ്രായപൂര്‍ത്തിയാവാത്ത കുട്ടി പൊലീസിന് മുന്നില്‍ എത്തിപ്പെടുന്നത്.
മാനന്തവാടി ട്രാഫിക് എസ്.ഐ അജിത്ത് കുമാറിന്റെ നേതൃത്വത്തിലായിരുന്നു വാഹന പരിശോധന. ഐഡി പരിശോധിച്ചപ്പോള്‍ കുട്ടിക്ക് പ്രായപൂര്‍ത്തിയായില്ലെന്ന് ബോധ്യപ്പെടുകയും , വാഹനം കസ്റ്റഡിയിലെടുക്കുകയുമായിരുന്നു. എന്നാല്‍ വാഹനത്തിന്റെ ഉടമയായ മാനു ഈ ബൈക്ക് കുറച്ചു നാള്‍ മുമ്പ് മാനന്തവാടി സ്വദേശിക്ക് വില്‍പ്പന നടത്തിയിരുന്നു. ആ വ്യക്തിയാണ് പ്രായപൂര്‍ത്തിയാവാത്ത കുട്ടിക്ക് വാഹനമോടിക്കാന്‍ നല്‍കിയത്.നിലവിലെ ഉടമ ആര്‍ സി മാറ്റാത്തതിനാലാണ് മാനു കേസില്‍ പ്രതിയായത്.
