പത്തനംതിട്ട ∙ വിഷുപ്പുലരിയിൽ കിഴക്കൻ മാനത്ത് ചക്രവാളത്തിനോട് വളരെയടുത്തായി മനോഹരമായൊരു ‘ആകാശവിഷുക്കണി’ കാണാം. മഴക്കാറില്ലാത്ത ആകാശമാണെങ്കിൽ ഇനിയുള്ള ഒരാഴ്ചക്കാലം ഈ ഗ്രഹസംഗമം വാനകുതുകികൾക്ക് ഒരാവേശമായിരിക്കുമെന്ന് അമച്വർ വാന നിരീക്ഷകൻ സുരേന്ദ്രൻ പുന്നശേരി പറഞ്ഞു. നേർത്ത ചന്ദ്രക്കലയുടെ തൊട്ടു താഴെ ബുധൻ (Mercury), ചൊവ്വ (Mars), ശനി (Saturn) എന്നീ ഗ്രഹങ്ങൾ അതിമനോഹരമായി അണിനിരക്കും. ബുധനാഴ്ച പുലർച്ചെയും വളരെ നേർത്ത ചന്ദ്രക്കലയുടെ ഒരു ഭാഗത്തായി ഈ മൂന്ന് ഗ്രഹങ്ങളെയും കാണാം.തുടർന്നുള്ള ദിവസം അമാവാസി ആയതിനാൽ ചാന്ദ്ര സാന്നിധ്യമുണ്ടാകില്ലെങ്കിലും ഗ്രഹങ്ങളുടെ ഈ മുക്കൂട്ട് മനോഹരമായി തുടരും. രാവിലെ ഏതാണ്ട് 5.25 മുതൽ 6 മണി വരെ ആയിരിക്കും കാഴ്ച ഏറ്റവും മനോഹരം. വെറും കണ്ണ് കൊണ്ട് തന്നെ കാണാവുന്നതാണെങ്കിലും ചെറിയൊരു ബൈനോക്കുലർ കാഴ്ചയെ കൂടുതൽ മനോഹരമാക്കും. ഈ സമയത്തുതന്നെ ചൊവ്വയുടെ അൽപം മുകളിലായി നെപ്റ്റ്യൂൺ (Neptune) ഉണ്ടാകുമെങ്കിലും ശക്തി കൂടിയ ടെലിസ്കോപിൽ മാത്രമേ അതിനെ കാണുള്ളൂ. ഈ ഗ്രഹസംഗമത്തിന് അൽപം വടക്കായി മങ്ങിയ പാൻ-സ്റ്റാർസ് (Pan-STARRS) എന്ന ധൂമകേതുവിനെയും (വാൽ നക്ഷത്രത്തെയും) കാണാം. കൂടുതൽ തെളിഞ്ഞു കാണാൻ ബൈനോക്കുലർ ഉപയോഗിക്കുന്നതാണ് നല്ലത്. സൂര്യപരിവേഷം കാഴ്ചയെ കുറച്ച് പ്രതികൂലമായി ബാധിച്ചേക്കാനിടയുണ്ടെന്നും പുന്നശേരി പറഞ്ഞു.
