കണ്ണൂർ∙ ചെറുപുഴയിൽ പെൺകുട്ടിയെ ക്രൂരമായി മർദിച്ച് പിതാവ്. എട്ടു വയസ്സുകാരിയായ പെൺകുട്ടിയാണ് ക്രൂര മർദനത്തിനിരയായത്. പിതാവ് ജോസ് മകളെ മർദിക്കുന്നതിന്റെ വിഡിയോ ദൃശ്യങ്ങൾ പുറത്തു വന്നു. കൂടെയുണ്ടായിരുന്ന അനുജനാണ് ദൃശ്യം പകർത്തിയതെന്നാണ് വിവരം. കുട്ടിയെ മർദിച്ച സംഭവത്തിൽ പിതാവിനെതിരെ പൊലീസ് ജുവനൈൽ ജസ്റ്റിസ് ആക്ട് പ്രകാരം കേസെടുത്തു. കസ്റ്റഡിയിൽ എടുത്ത പിതാവിനെ പൊലീസ് ഉടൻ അറസ്റ്റ് ചെയ്തേക്കും. സംഭവത്തിൽ സംസ്ഥാന ബാലാവകാശ കമ്മിഷനും കേസെടുത്തു.
വാക്കത്തി കൊണ്ട് കുട്ടിയെ വെട്ടാൻ ഓങ്ങുന്നതും തല്ലല്ലേ എന്ന് നിലവിളിച്ച് കുട്ടി കൈകൂപ്പി നിൽക്കുന്നതും വിഡിയോയിൽ കാണാം. ‘നിന്റെ അമ്മയെ വേണോ എന്നെ വേണോ’ എന്ന് പിതാവ് ചോദിക്കുമ്പോൾ അച്ഛനെ മതി എന്നും കുട്ടി പറയുന്നുണ്ട്.
മറ്റൊരു വിഡിയോയിൽ ആൺകുട്ടി അമ്മയോട് തിരിച്ച് വരാൻ ആവശ്യപ്പെടുന്നുണ്ട്. പേടി തോന്നുന്നതായും അമ്മയോട് വേഗം വരാനുമാണ് ആൺകുട്ടി ആവശ്യപ്പെടുന്നത്. കുട്ടികളുടെ അമ്മ ഭർത്താവുമായി പിരിഞ്ഞ് കഴിയുകയാണ്. ഇവരെ തിരികെ കൊണ്ടുവരുന്നതിനായാണ് കുട്ടികളെ മർദിച്ചതെന്നാണ് വിവരം. വിഡിയോ പുറത്ത് വന്നതോടെ പൊലീസ് അന്വേഷണം ആരംഭിച്ചു. ‘പ്രാങ്ക് വിഡിയോ’ ആണെന്നാണ് പിതാവ് പൊലീസിനോട് പറഞ്ഞത്.
