Listen live radio
- Advertisement -
ഡല്‍ഹി: മൊബൈല്‍ ഫോണ്‍ മോഷ്ടിച്ചെന്നാരോപിച്ച്‌ പടിഞ്ഞാറന്‍ ഡല്‍ഹിയില്‍ യുവാവിനെ മര്‍ദ്ദിച്ച്‌ കൊലപ്പെടുത്തി. 32 വയസ്സുള്ള യുവാവാണ് കൊല്ലപ്പെട്ടത്.
വെള്ളിയാഴ്ച്ച പടിഞ്ഞാറന്‍ ഡ‍ല്‍ഹിയിലെ ലോഹ മന്ദിയിലാണ് സംഭവം നടന്നത്. സംഭവത്തില്‍ നാല് പേരെ പൊലീസ് അറസ്റ്റ് ചെയ്തു. യുവാവിനെ മര്‍ദ്ദിക്കുന്നതായി വിവരം ലഭിച്ചതിനെ തുടര്‍ന്നാണ് പൊലീസ് സ്ഥലത്തെത്തിയത്.
ഗുരുതരമായി പരിക്കേറ്റ നിലയില്‍ മരത്തിന് ചുവട്ടില്‍ കിടക്കുന്ന യുവാവിനേയാണ് പൊലീസ് കണ്ടത്. നാല് പേര്‍ ചേര്‍ന്ന് യുവാവിനെ സ്ഥലത്തെ മുന്‍സിപ്പല്‍ പാര്‍ക്കില്‍ കൊണ്ടുവന്ന് മരത്തില്‍ കെട്ടിയിട്ട് മര്‍ദ്ദിക്കുകയായിരുന്നുവെന്ന് ദൃക്സാക്ഷി പറയുന്നു. വടിയും ഇരുമ്ബ് ദണ്ഡും ഉപയോഗിച്ചായിരുന്നു മര്‍ദ്ദനം.
മര്‍ദ്ദിക്കരുതെന്ന് യുവാവ് കേണപേക്ഷിച്ചിട്ടും അക്രമികള്‍ നിര്‍ത്തിയില്ല. യുവാവും സഹായിയും ചേര്‍ന്ന് ഒരു ട്രക്കില്‍ നിന്ന് മൊബൈല്‍ ഫോണ്‍ മോഷ്ടിച്ചെന്നാരോപിച്ചായിരുന്നു മര്‍ദ്ദനം.
മര്‍ദ്ദനമേറ്റ് യുവാവ് ബോധരഹിതനായതോടെ നാല് പേരും സ്ഥലം വിട്ടു. കീര്‍ത്തി നഗറിലെ ജവഹര്‍ ക്യാമ്ബിലുള്ള രാഹുല്‍ എന്നയാളാണ് കൊല്ലപ്പെട്ടത്.
