ലോകമഹാദ്ഭുതമായ താജ്മഹലിലെ കബറിടങ്ങൾ സൗജന്യമായി കാണാൻ സഞ്ചാരികൾക്ക് അപൂർവ അവസരം. മുഗൾ ചക്രവർത്തി ഷാജഹാന്റെ 371-ാമത് ഉറൂസിനോട് അനുബന്ധിച്ചാണ് മൂന്ന് ദിവസം പൊതുജനങ്ങൾക്ക് സൗജന്യ പ്രവേശനം അനുവദിക്കുന്നത്. വർഷത്തിലൊരിക്കൽ മാത്രം നടക്കുന്ന ഉറൂസ് ദിനങ്ങളിൽ മാത്രമാണ് ഷാജഹാന്റെയും മുംതാസിന്റെയും യഥാർത്ഥ കബറിടങ്ങൾ സ്ഥിതിചെയ്യുന്ന ഭൂഗർഭ അറ സന്ദർശകർക്കായി തുറന്നുകൊടുക്കുക.തീയതികൾ കുറിച്ചുവെക്കാം.
ജനുവരി 15, 16, 17 തീയതികളിലാണ് ഈ സൗകര്യം ലഭ്യമാകുന്നത്. സമയക്രമം താഴെ പറയും പ്രകാരമാണ്:ജനുവരി 15, 16: ഉച്ചയ്ക്ക് 2 മണി മുതൽ സന്ദർശനം അനുവദിക്കും.
ജനുവരി 17: ദിവസം മുഴുവൻ പ്രവേശനം സൗജന്യമായിരിക്കും.സാധാരണയായി ഭാരതീയർക്ക് താജ്മഹൽ കോമ്പൗണ്ടിൽ കടക്കാൻ 50 രൂപയും പ്രധാന കബറിടം കാണാൻ 200 രൂപയുമാണ് നിരക്ക്. വിദേശികൾക്ക് ഇത് 1100 രൂപ വരെയാണ്. ഉറൂസ് ദിനങ്ങളിൽ ഈ ടിക്കറ്റ് നിരക്കുകൾ ഇല്ലാതെ തന്നെ എല്ലാവർക്കും പ്രവേശിക്കാം.
പ്രണയസ്മാരകത്തിലെ അപൂർവ കാഴ്ചനാല് നൂറ്റാണ്ടുകൾക്ക് മുൻപ് ഷാജഹാൻ ചക്രവർത്തി തന്റെ പ്രിയതമ മുംതാസിനായി പണികഴിപ്പിച്ചതാണ് ഈ ധവളമന്ദിരം. സാധാരണ ദിവസങ്ങളിൽ മുകൾഭാഗത്തുള്ള കബറിടത്തിന്റെ മാതൃകകൾ മാത്രമാണ് സന്ദർശകർക്ക് കാണാൻ സാധിക്കുക. എന്നാൽ ഉറൂസ് ദിനങ്ങളിൽ ഭൂഗർഭ അറയിലെ യഥാർത്ഥ കബറിടങ്ങൾ ദർശിക്കാമെന്നതാണ് പ്രത്യേകത. 22 വർഷത്തോളം നീണ്ട കഠിനാധ്വാനത്തിലൂടെ നിർമ്മിച്ച താജ്മഹലിലേക്ക് ഈ ദിവസങ്ങളിൽ വൻ ജനത്തിരക്കാണ് പ്രതീക്ഷിക്കുന്നത്.
